கவிவலம்

Saturday, May 1, 2010

அவனின்
வெள்ளித்திரை
குணங்களை விட
வெளிப்படையான
வெளிப்படும் செயல்களுக்கு
அதிகம்
ரசிகர்கள்...

உன் இருப்பு
உண்மையா பொய்யா
கானல் நீர் போல
பொய்த்து
மெய்யாகிறாய் - வெறும்
மெய்யாகிறாய்...

விழிக்கும் மொழிக்குமான
போரில்
உதிர்கின்றன
ஊனமான கவிதைகள்...

எதிர்பார்க்கும் நேரத்தில்
எதிர்பாராது கிடைத்த
இரு இட்லிக்காக
மகிழ்கிறேன் - மேலும்
ஒன்று கேட்கையில்
தீர்ந்த போது...

தொலைதூர பயணத்தில்
நானும் நானுமற்ற என்
தனிமையும் உறவாடுகிறோம்
ஒலி, வரி அற்ற மொழியில்...

பயணச் சீட்டிற்கு
பணமில்லா நாளொன்றில்
பாதி ஊர்வலத்தில்
பங்குபெற்றேன்
விலைவாசி உயர்வை எதிர்த்து...

உறவினரை
கண்ணீருடன் வரவேற்கிறாள்
இறந்த வீடு

எவ்வளவு குடித்தாலும்
ஏறவில்லை போதை - ‍விலை
ஏற்றம்...

விளம்பரம் செய்யாதீ ரென செய்யும்
விளம்பரத்திற்கு அபராதம் எத்தனை...

கால அட்டவணை அமைத்து
காதல் சொல்கிறோம் - ஒவ்வொரு
பெண்ணு மொரு
பாடமாக - பல
தோல்விகள் கண்டு
தேர்ந்திடுவோம் ஒன்றிலாவது...